暗戀的心情

今日阿婆又有新動作，當時她在客廳，用焦急的聲線呼喚：「芝芝！出來哦！」我急跑出，見她躺在沙發，狀甚悠閒，指着電視：「芝芝，你鍾唔鍾意佢呀？」屏幕中的男孩，抱歉我不知道是誰。我說：「你咁急叫我，就係為左問我係咪鍾意一個我唔識嘅人。」她笑，笑得很高興。此事發生了3次，每次我都中招，每次我都跑出去。
夜裡，我終於知道他是誰：台劇《幸福街第3號出口》男主角姚元浩。阿婆作為一屆青春少艾，喜歡上台灣偶像劇演員，本人深表理解，我不明白的是，為何要屈我鍾意佢。不知閣下兒時有沒有以下經歷，就是你暗戀一個人，但你屈同學，死話同學鍾意佢，其實暗戀嗰個，係你。我認為婆婆現在就是這種心態，而我作為一位被屈的同學，只能繼續被屈。每次當電視播放此劇廣告，她都會說：「你鍾唔鍾意佢？你鍾意佢！」每•一•次！你咪同佢講囉，好煩呀！死靚妹，小學雞行為。但我明；暗戀，是心煩的，暗戀者身邊人的心情，是更心煩的。• • ‪